Dúirt ardchonstábla na bpóilíní sa Tuaisceart Jon Boutcher nach féidir glacadh le dlí an tslua i dtaca leis an aighneas faoin bparáid Oráisteach i bPort an Dúnáin agus dúirt sé go raibh mórfhiosrúchán coiriúil ar bun ag na póilíní faoi léirsiú neamhdhleathach ar Bhóthar Gharbhachaidh.
I ráiteas, dúirt Jon Boutcher go leanfadh a chuid oifigeach orthu ag póilíniú na conspóide faoin bparáid "go neamhspleách agus go neamhchlaonta" agus mhaígh sé gur ar na póilíní a thit an cúram arís eile "an turraing sa tsochaí a mhaolú", mar a dúirt sé.
Na béiceacha atá daoine a ligean air, arsa sé, ní rachaidh siad i gcion ar a bhreithiúnas, olc ná maith.
Dúirt sé go raibh treoir shoiléir tugtha aige dá chuid oifigeach fianaise a bhailiú faoin léirsiú ar Bhóthar Gharbhachaidh agus próiseas ceartais choiriúil a chur sa siúl.
Tá an tOrd Oráisteach i bPort an Dúnáin ag éileamh ar na póilíní an dlí a chur i bhfeidhm maidir leis an gcinneadh a rinne Coimisiúin na bParáidí faoin bparáid i bPort an Dúnáin.
Dé hAoine seo caite, thug Coimisiún na bParáidí cead don Ord Oráisteach máirseáil trí cheantar náisiúnach Bhóthar Gharbhachaidh an Domhnach dar gcionn, cinneadh a bhfuil na háitritheoirí ag cur go láidir ina aghaidh.
Caitheadh amhras ar chinneadh Choimisiún na bParáidí san Ardchúirt i mBéal Feirste ar an Satharn ach daingníodh an cinneadh sa Chúirt Achomharc go deireanach an oíche sin.
Ní hé sin deireadh an scéil ó thaobh an dlí de, áfach, ó tá áitritheoirí Bhóthar Gharbhachaidh ag iarraidh ar an gCúirt Achomharc éisteacht eile a thabhairt dóibh.
Cuirfear an t-iarrtas sin os comhair na cúirte arú amárach.
Tá áitritheoirí Bhóthar Gharbhachaidh agus a lucht tacaíochta ag léirsiú ar an mbóthar ó fógraíodh cinneadh Choimisiún na bParáidí le dúil na hOráistigh a choinneáil amach as an gceantar, agus sin é an "dlí an tslua" a raibh Jon Boutcher ag caint air, de réir dealraimh.
Is caint níos boige ná Jon Boutcher a rinne Stát-Rúnaí an Tuaiscirt Chris Bryant faoin gconspóid inniu.
Dúirt sé go raibh na comhráite a bhí aige go dtí seo le gach dream a bhfuil guthaíocht acu ar an gceist, go raibh siad "cairdiúil, oscailte agus macánta".
Thug sé le fios go deimhin go rabhthas "ag teacht i gcóngar" réitigh agus nár theastaigh ach iarracht amháin eile, iarracht a chaithfeadh gach dream a dhéanamh in éineacht.
Bhí tuilleadh cruinnithe ag Chris Bryant inniu leis an Ord Oráisteach agus le háitritheoirí Bhóthar Gharbhachaidh i gCaisleán Chromghlinne i gCo an Dúin ach níl aon dream díobh ag caint fós ar a bheith "i gcóngar" réitigh.
Nuacht agus Cúrsaí Reatha RTÉ
